മനുഷ്യനെ മൊബൈല്‍ ഫോണിനോടുപമിച്ചിട്ടുണ്ടോ? അടുത്തിടെ ഒരു വെല്‍നെസ് സെമിനാറില്‍ ഞാനിത് വിജയകരമായി പരീക്ഷിക്കുകയുണ്ടായി. ചില പ്രപഞ്ചസത്യങ്ങള്‍ സ്മൂത്തായി വിശദീകരിക്കാനും സാധിച്ചു.
ഹാന്റ് സെറ്റ് | ശരീരം |
ബാറ്ററി/ഊര്‍ജ്ജം | വായു ഭക്ഷണം വെള്ളം വ്യായാമം വിശ്രമം |
മെമ്മറി/പ്രൊസസര്‍ | ബുദ്ധി മനസ്സ് |
കീപാഡ് സ്ക്രീന്‍ ക്യാമറ സ്പീക്കര്‍ മൈക്ക് ബ്ലൂടൂത്ത് വൈഫൈ | ഇന്ദ്രിയങ്ങള്‍ |
ഫയലുകള്‍ പ്രോഗ്രാമുകള്‍ ഓപ്പറേറ്റിംഗ് സിസ്റ്റം | ചിന്തകള്‍ |
സിംകാര്‍ഡ് | ആത്മാവ് |
സിംകാര്‍ഡിനെ ആത്മാവിനോട് ഉപമിച്ചപ്പോള്‍ സദസ്സില്‍ ചിരിപൊട്ടി, എനിക്ക് വട്ടാണ് എന്ന അര്‍ത്ഥത്തില്‍ തന്നെ. സാരമില്ല, പതിനായിരം രൂപയ്ക്ക് ആപ്പിള്‍ ഐഫോണ്‍ തരാമെന്നൊരാള്‍ പറഞ്ഞപ്പോള്‍ അയാള്‍ക്ക് വട്ടാണെന്ന് ഞാനും കരുതിയതല്ലേ. (ചൈനാപ്പിള്‍ ഐഫോണിന്റെ ഐമെയ്, ലീഗലി മാറ്റിയെഴുതിയിട്ടും സിം പിടിക്കുന്നില്ല, വിളി നടക്കുന്നില്ല. ബാക്കിയെല്ലാ പരിപാടികളും ഓക്കെ)
ആത്മാവില്ല എന്ന് വാദിക്കുന്നവരുണ്ട്. തെറ്റെന്ന് പറയാന്‍ ബുദ്ധിമുട്ടാകും. ഒരു വൈഫൈ മൊബൈലും ബ്രോഡ്ബാന്റ് കണക്ഷനുമുണ്ടെങ്കില്‍ സിം ഇല്ലാതെ, വലിയ പണച്ചെലവില്ലാതെ ഇന്റര്‍നാഷനല്‍ കോളുകള്‍ വിളിക്കാം എന്ന് തെളിയിച്ചവരല്ലേ ഗള്‍ഫ് മലയാളികള്‍ . വലിയൊരു പരിധിവരെയുള്ള ജീവിതത്തിന് ആത്മാവ് വേണമെന്നില്ല. ഒരു സിം കാര്‍ഡും സ്വന്തമായൊരു നമ്പറും ഉണ്ടെന്നു കരുതി നെയ്യപ്പത്തില്‍ നെയ്യ് കൂടിപ്പോയെന്ന് പരിഭവിക്കേണ്ട കാര്യവുമില്ലല്ലോ. പരമമായ ടവറിലെ സെര്‍വറില്‍ നിന്ന് വല്ലപ്പോഴും ഒരു ഇന്‍‌കമിംഗ് ഉണ്ടായാലോ!
മൊബൈലില്‍ മെമ്മറിയുണ്ടെങ്കില്‍ പാട്ടും പടവും കയറ്റാം, ആസ്വദിക്കാം. ഓപ്പറേറ്റിംഗ് സിസ്റ്റം അനുസരിച്ച് ‘ആപ്സ് ’ തെരഞ്ഞെടുക്കാം. ബ്ലൂടൂത്തും വൈഫൈയും വഴി പലതും കൈമാറാം. ഒരുപാട് പേരുടെ നമ്പറുകളും എസ്സെമ്മസ്സും ശേഖരിച്ചു വയ്ക്കാം. മനസ്സില്‍ വൈറസ് ചിന്തകള്‍ കയറ്റാത്തിടത്തോളം ജീവിതസിസ്റ്റം ഹാങ്ങാകാതെ നോക്കാം.
എന്തൊക്കെയുണ്ടെങ്കിലും ബാറ്ററിയില്‍ ചാര്‍ജ്ജ് വേണം. ശരീരത്തില്‍ ഊര്‍ജ്ജമുണ്ടെങ്കിലേ അത് പ്രവര്‍ത്തിക്കൂ. വായുവും ഭക്ഷണവും വെള്ളവും വ്യായാമവും വിശ്രമവും യഥാവിധി കൊടുത്ത് ചാര്‍ജ്ജ് നിലനിര്‍ത്തണം. ഇതുകൂടിയായാല്‍ വെല്‍നെസ് ആയി.
പലരും ഓഫ് ലൈന്‍ കമ്യൂണിസം ഉപേക്ഷിച്ച് ഓണ്‍ ലൈന്‍ കമ്യൂണിറ്റിയിസത്തിലേക്ക് ചേക്കേറുന്ന കാലമാണ്. ഹാന്റ് സെറ്റ് ഏത് മോഡലായാലും, മെമ്മറി എത്രയായാലും, കണക്ഷന്‍ ഏതായാലും, മനുഷ്യന്‍ നന്നായാല്‍ മതി എന്നല്ലേ ഗുരു വചനം!
No comments:
Post a Comment
പോസ്റ്റ് ചെയ്തിരിക്കുന്ന വിഷയത്തേക്കുറിച്ചു മാത്രം കമന്റ് ചെയ്യാന്‍ താല്പര്യപ്പെടുന്നു. മറ്റു വിഷയങ്ങള്‍ക്ക് ദയവായി ഈമെയില്‍ ചെയ്യുക.